Jæja, þá getur maður loksins byrjað að bulla aftur!
Hef svo sem ekki margt að segja, nema það að únglíngurinn á heimilinu er í Svíþjóð. Hlutirnir eru ekki lengi að gerast á þessu heimili. Hann ákvað á sunnudaginn að sleppa tónleikunum sem hann ætlaði á í London og fara frekar til Svíþjóðar á sömu tónleika, af því þangað voru að fara 5 félagar hans frá Íslandi. Þegar leyfi var fengið frá yfirvaldinu (sem tók dágóðan tíma og töluverðar umræður og pælingar) var farið í það að bóka flug til Stokkhólms. Það fékkst fyrir heilar 6500 íslenskar krónur með RyanAir. Þá þurfti að bóka rútu til Stansted og pæla í rútu/lestarferðum frá Skavsda airport til Stokkhólms. Svo þurfti að skila lestarmiðunum sem búið var að kaupa til London, afpanta hótelið og selja tónleikamiðann á Ebay, sem gekk mjög fljótt fyrir sig.

En sem sagt, heilmikið ferðalag. 4 tímar með rútu á Stansted, 2 tíma flug til Svíþjóðar, klukkutíma rútuferð til Stokkhólms og svo þaðan á gistiheimilið þar sem félagarnir voru. Þetta gekk allt saman mjög vel og vonandi gengur það jafn vel á heimleiðinni. 

Jæja, Loksins er þetta batterý komið í lag. Blogga seinna í dag eða í kvöld

Ég þoli ekki vöðvabólgur!! Ég er svo undirlögð af þessu ógeði, að ég er liggur við rúmliggjandi! Lá í stofusófanum í gær og gat ekki hreyft mig, með ógleði af verkjum. Held þetta sé tölvan sem veldur. Maður situr með tölvuna á hnjánum öll kvöld í stað þess að sitja í góðum stól með tölvuna á borðinu. Hef grun um að þetta sé merki um að ég eigi að eyða meiri tíma í lærdóm, en minni í tölvunni!

Sendi Magga út af örkinni í gærkvöldi til að kaupa kínverskan mat þar sem ég nennti ekki að elda í þessu ástandi. Uppgötvuðum nefnilega í gær að það er kínverkur take away staður hérna rétt hjá okkur, og hann leit meira að segja mjög vel út. Maggi keypti handa mér núðlurétt sem var alveg snilldargóður og þvílíkt vel útilátið. Skammturinn hefði dugað tveimur, en þar sem Maggi Jr. og Viktor vilja ekki kínverskt fór Maggi með þá á KFC og þeir fengu sér kjúkling *hrollur*

Talandi um glæpi hérna í Nottingham og Englandi yfirhöfuð, þá get ég sagt ykkur að í fyrradag var maður numinn á brott hér í Nottingham, af fjórum mönnum, farið með hann út fyrir borgina og hann skotinn mörgum skotum. Ótrúlegt en satt, þá dó hann ekki. Hann hefur þegar sagt að hann hafi ekki þekkt mennina sem gerðu þetta!!

Þessa dagana er verið að yfirheyra mann vegna hvarfs tveggja drengja, 10 og 13 ára, á annan í jólum fyrir 10 árum. Þeir hafa aldrei fundist, en þessi maður, sem áður hafði verið dæmdur fyrir nauðgun og morð á 10 ára dreng.

Maður verður bara geggjaður af að fá sjónvarpið aftur, endalausar ógeðisfréttir sem þessar!! Sá viðtal í gær við foreldra 11 ára drengsins sem ég sagði ykkur frá að hefði verið myrtur af 15 ára strák af engu tilefni. Það var verið að dæma hann til 12 ára fangelsisvistar og foreldrar fórnarlambsins mjög ósátt. Sorglegt að horfa á þegar pabbi hans brotnaði saman við að tala um að þegar maður missti barn, þá dreymdi mann barnið mikið, og þá gæti maður talað við það, en svo tæki kaldur og hranalegur raunveruleikinn við þegar maður vaknar

Sá líka viðtal um daginn við foreldra drengs sem var keyrður niður í Skotlandi og svo keyrt í burtu. Hann dó og foreldrarnir voru að biðja ökumanninn að gefa sig fram, þetta væri svo mikil svívirðing og óvirðing, að keyra á barn og huga ekki að því hvort það er slasað eða látið. Vorkenndi þeim svoooo mikið, þau eru greinilega lágstéttarfólk og litu út fyrir að vera hálfþroskaheft. Pabbinn las skilaboðin af blaði til ökumannsins. Voru svo brotin og buguð greyin. Við búum í ljótum heimi, það er ljóst!!

Ef þið vitið um einhvern sem verður í London sem ég þekki, frá 18-20 nóvember, megið þið gjarnan láta mig vita. Er að fara með Magga þar sem hann er að fara á tónleika, en vinur hans á Íslandi sem ætlaði með honum kemst ekki.
Ekki sendum við hann einan til London svo ætli ég neyðist ekki til að fara, eyða grilljón í lest og gistingu!! Maggi fer á tónleikana seinnipartinn á sunnudeginum og hvað á ég að gera alein og yfirgefin í London frá kl. 4 og fram að miðnætti þegar hann kemur aftur??

Ekki verð ég ein á ferðinni, það er ljóst. Hins vegar gæti ég keypt mér mat, nammi og gos og verið inni á hótelherbergi að læra......ekki veitir af

See ya later.....
Miss M.

Well well......þá er nýtt sjónvarp komið í hús. Ekki gekk þrautalaust fyrir sig að grenja það út, en loksins seinni partinn í gær lenti Maggi á einu manneskjunni sem hann hefur talað við með viti í þessu máli. Þjónustan hjá þessu fyrirtæki hefur verið með ólíkindum léleg. Um það bil 8 sinnum hefur Magga verið sagt að það verði hringt í hann til baka eftir smástund eða daginn eftir með nánari upplýsingar, en það var ALDREI hringt! Ekki í eitt skipti. Ekki einu sinni í gær þegar hann hringdi og æsti sig öll ósköp, þuldi upp skiptin sem hefði átt að hringja í hann og hefði ekki verið gert og sagði þjónustuna hjá fyrirtækinu til háborinnar skammar. Þá var honum sagt af manni sem var orðinn ansi aumingjalegur í málrómnum, að hann ætlaði að ganga í þetta strax og hringja seinna um daginn. Maggi spurði hann þá hvort það væri öruggt að hann myndi hringja, og hann hélt það nú!!

En viti menn, hann hringdi aldrei! Maggi hringdi þá aftur og fékk samband við annan mann sem sagði honum bara að hringja aftur á morgunn! Þannig að hann brunaði niður í búðina og sagði konu þar að 28 dagar væru liðnir, hann ætti að fá nýtt tæki og færi ekki fyrr en hann hefði það undir höndum. Þetta var sem sagt eina manneskjan með viti í fyrirtækinu og fékk hann góða þjónustu hjá henni. Önnur kelling sem vinnur þarna og Maggi talaði við um daginn, og hún lofaði honum að hringja seinna um daginn, varð eins og fífl og starði bara eitthvað út í loftið! Enda passaði Maggi að hún heyrði örugglega þegar hann sagði hinni að hún væri eina manneskjan með viti sem hann hefði lent á í þessu fyrirtæki.......og trúið mér, hann hefur talað þær ansi margar!!!

En alla vega, sjónvarpið er komið í hús og strax farið að angra mig! Mikið var þægilegt að vera sjónvarpslaus, meira að segja strákarnir voru orðnir vanir því. Þvílík ró og friður á kvöldin. Allir að lesa eða gera eitthvað allt annað en að móttaka áreitið frá þessu helvítis drasli! Þegar synir mínir eru farnir að heiman ætla ég ekki að eiga sjónvarp. Ætla bara að eiga bókaherberi og tónlistarherbergi og eyða kvöldunum í ró og næði, með góða bók og tebolla fyrir framan arininn

Veðrið hér er yndislegt, 8-9° hiti og sól. Yndislegt að hafa svona langt haust, dásamlegt alveg hreint.

Jæja, ég ætla að fara að læra. Eigið góðan dag.

Miss M.

Undur og stórmerki gerðust í gærkvöldi. Ég fór inn í rúm kl. 11 í gærkvöldi en fyrir þá sem ekki vita, þá fer ég venjulega í rúmið milli hálfþrjú og þrjú á næturna og seinna um helgar. Fari ég fyrr í rúmið er það merki um að ég sé frekar mikið veik! Og það var ég í gær, drulluslöpp og hélt ekki höfði. Vaknaði aðeins skárri en samt fremur drusluleg og slöpp.
Ætlunin var að fara í bíó í dag en ætli því verði ekki frestað til morguns.

Leiði oft hugann að því hvað gerist mikið af hræðilegum atburðum hérna. Auðvitað víða annars staðar í heiminum, en að sjálfsögðu ekki á besta Íslandi, og þess vegna tekur maður svona mikið eftir þessu.

Fyrir nokkrum dögum gerðist sá hræðilegi atburður að kveikt var í húsi sem hjón ásamt fjórum dætrum sínum sváfu inni í og þau dóu öll. Eini sonurinn í fjölskyldunni var ekki heima. Nei.....hann var á sjúkrahúsi við dauðans dyr vegna krabbameins!!

Fyrir um mánuði síðan hengdi kona sig og börnin sín tvö, 2. og 3. ára!!

Fyrir nokkru síðan fjölluðu fréttirnar mikið um mann sem hafði verið handtekinn fyrir nauðganir og morð á börnum og unglingum í London. Maður kominn yfir miðjan aldur, í virtu embættisstarfi, giftur og á uppkomin börn. Kallaður Mr. Nice Guy af samstarfsfélögum *gubb*
Eftir vinnu klæddi hann sig í dulargervi, fór í göngutúr, dró stelpur með sér inn í runna, nauðgaði þeim á hrottalegan hátt og drap þær!! Fór svo heim til konunnar og borðaði sinn kvöldmat í mestu makindum!

Um daginn var 15 ára drengur dæmdur í fangelsi fyrir að myrða 11 ára gamlan dreng sem var á leið heim úr skólanum. Enginn veit af hverju. Kannski hafði greyið bara ekkert að gera.

Fyrir um mánuði síðan var 17 ára strákur skotinn fyrir utan verslunarmiðstöð hér í Nottingham og annar stunginn til bana tveimur dögum seinna.

Allir muna eftir því þegar stelpurnar tvær voru misnotaðar, pyntaðar og drepnar á hrottalegan hátt fyrir hvað.......2-4 árum síðan, hér í Englandi!!

Unglingspiltur gekk að 9 ára strák í almenningsgarði fyrir nokkru síðan, hellti yfir hann bensíni og kveikti í honum!!

Verið var að dæma tvo bræður í fangelsi í London fyrir morð sem þeir frömdu þegar þeir voru 11 og 12 ára. Drápu strák á sínu reki, man ekki af hverju, en hann var þeim ókunnugur og algjörlega saklaus. Hvort þeir ætluðu ekki bara að stela af honum gemsanum hans eða eitthvað álíka!

Tímaritin hér eru stútfull af frásögnum af hrottalegum morðum á óbreyttum borgurum, sem framin eru af brjálæðingum sem verða á vegi þeirra úti á götu. Ýmsir sjónvarpsþættir fjalla um gömul og ný sakamál í Bretlandi, og er ansi merkilegt á að horfa, en kemur virkilega á óvart hversu ljót mál hafa komið upp hérna frá örófi alda. Fjöldamorðingjar, nauðgarar, barnaníðingar og bara nefnið það.

Maggi keypti sér bók um daginn sem hafði það áhugaverðan titil að ég ákvað að lesa hana, þrátt fyrir að eiga að vera að lesa allt annað!

Bókin er skrifuð af konu sem er sennilega um sextugt í dag og fæddist í Skotlandi. Bjó þar í fremur litlum bæ með foreldrum og bræðrum. Þegar hún var 8 ára hvarf 12 ára gömul stelpa úr bænum sporlaust og hefur ekki enn fundist. Konan segir frá því hvernig pabbi hennar kom fram við vinkonur hennar með mjög skrýtnum hætti og hagaði sér á engan hátt eðlilega.
Í stuttu máli sagt, þegar amma konunnar deyr kemst hún að því að pabbi hennar hafi sennilega verið viðriðinn þetta barnshvarf 40 árum áður og að hann var þekktur barnaníðingur. Allur bærinn vissi, en enginn sagði eða gerði neitt vegna þess að fólk vildi hlífa mömmu hennar!!

Hann sat í fangelsi fyrir að nauðga barnapínunni þeirra, en börnunum var sagt að hann væri á spítala og þangað mætti ekki fá heimsóknir. Kallinn reyndi að tæla allar stelpur í bænum, misnotaði börn frá 2 ára aldri og upp úr og reyndi við allar kellingar sem hann komst í tæri við. Mamma hennar vissi um flest af þessu, en fannst sennilega of skömmustulegt að segja frá.

Alla vega, þegar hún kemst að því að kallinn hafi sennilega haft eitthvað með þetta að gera byrjar hún að rannsaka málið upp á eigin spýtur, talar við lögreglumenn sem hún fær í lið með sér og eyðir um 10-13 árum í að reyna að komast að þessu, eða þar til helvítis kallinn deyr!! Á ég nokkuð að segja ykkur hvernig þetta endar? Þið gætuð viljað lesa bókina seinna meir.

Alla vega, mér finnst mikið um glæpi hérna þar sem börn koma við sögu, hvort sem þau eru gerendur eða þolendur. Finnst að breska þjóðin þurfi að fara að gera eitthvað drastískt til að lækka tíðni glæpa meðal barna og unglinga. Heilbrigðari æska þýðir heilbrigðari fullorðna í framtíðinni. Eins og ég hef sagt ykkur áður eru bresk börn þau óhamingjusömustu í Evrópu. Tengslin eru augljós!!

Cheers

Um daginn fórum við í foreldraviðtal í skólanum hans Viktors, sem gekk mjög vel. Hann er allur að koma til og aðlagast ágætlega. Hann var svo heppinn að tveir kvenskörungar úr bekknum hans tóku hann undir sinn verndarvæng og segja honum hvað hann á að gera. Önnur þeirra situr við hliðina á honum í stofunni og er víst dugleg að píska hann áfram ef henni finnst hann ekki vinna nógu hratt!

Í gær fórum við svo í viðtal í Magga skóla, og ég verð nú bara að segja, að betra er seint en aldrei og það er af sem áður var!! Kennarinn hans lét reyndar afskaplega vel af honum, sagði hann þægilegan á allan hátt og að gott væri að vera nálægt honum. Hann TALAÐI ÞÓ ALLT OF LÍTIÐ OG ÞAÐ FÆRI OF LÍTIÐ FYRIR HONUM!!!! *hakaniðurígólf*

Uhhh.....síðan hvenær fer OF lítið fyrir syni mínum?? Og ég man mjög greinilega niðurlæginguna þegar kennarinn hans í Giljaskóla spurði mig hvort ég vissi að það væri hægt að tala meðan maður synti!! Það nefnilega gat hann sonur minn mjög vel, og gerði óspart. Kennararnir mikið búnir að velta fyrir sér hvernig væri hægt að synda og vera jafnframt í hrókasamræðum við einhvern á meðan! Og allar umsagnir úr grunnskóla........"voðalega þægilegur strákur, góður, er aldrei leiðinlegur við neinn, afskaplega ljúfur og hlýðir öllu". En hann gat aldrei haldið kjafti!! Varla eitt andartak. Því segi ég það, betra er seint en aldrei og það er svo sannarlega af sem áður var!

Enda gat hann ekki annað en brosað sjálfur

En kennarinn hans sagði að hann virtist mun ánægðari nú en fyrst (sem er alveg rétt) og að hann hefði greinilega gríðarlegan áhuga á viðfangsefninu (sem líka er alveg rétt). Hún sagði að þegar hún færi að tala um viðfangsefnið við hann (tónlist) þá lyftist andlitið allt upp og hann ljómaði eins og sól í heiði. En hann mætti vera duglegi að trana sér fram! Hann er þó búinn að eignast ágætis vinkonu og kynnast nokkrum af vinum hennar. M.a. buðu þau honum í hrekkjavökupartý og svo heim til eins vinarins kvöldið eftir til að hlusta á tónlist og éta snakk......hvað annað!

Þetta er afskaplega vandaður og góður skóli sem hann er í og hefur góðan orðstír. Starfsfólki er sérlega umhugað um nemendur og fylgst er grannt með líðan hvers og eins. Krakkarnir mæta í grúppum á hverjum morgni og tala við umsjónarkennarann um daginn og veginn og um það hvað er að gerast í heiminum hverju sinni, þ.e. hvaða fréttir eru efst á baugi hvern dag.

Talandi um kennarann hans Magga! Maggarnir báðir voru búnir að segja mér að hún hefði mjög svo sérstakan hreim, mjög áberandi. Ég beið spennt eftir að heyra, en Guð minn góður!! Ég tel mig nú frekar kúltiveraða manneskju sem á auðvelt með að stilla mig ef eitthvað er fyndið, en óviðeigandi að hlæja, en það átti ég erfitt með þegar ég hitti Miss George. Ég gat varla setið á mér. Það var svo fyndið hvernig hún talaði, ég hef aldrei heyrt þennan svaaaaakalega hreim áður. Og ég er ekki að tala um Cockneyhreim eða Oxfordhreim. Þetta er annað hvort skoskur eða írskur hreimur, og sá sterkasti sem ég hef nokkru sinni heyrt. En hún talaði mjög skýrt.
Ég þarf eiginlega að senda Magga með diktafón í skólann til að taka upp svo ég geti æft mig í hreimnum

En þeir virðast sem sagt báðir vera á réttri leið og farið að líða betur en áður.

Cheers