Aðalvalmynd

Auglýsing

Prófíll

  • Nafn: Miss Marvellous
  • Staður: Nottingham
  • Atvinna: Mastersnemi í alþjóðasamskiptum
  • Um mig: Hef nýlokið mastersnámi í mannréttindafræðum og er enn að læra. Hef gaman af ferðalögum (ekki tjaldferðalögum!), matargerð, söfnun uppskrifta, söng, leikhúsferðum og bókalestri. Mikil áhugamanneskja um mannréttindi, sagnfræði og mannlegt eðli.

Gagnasafn

Blogghlé

29. febrúar 2008 klukkan 09:59

Var búin að skrifa langa færslu fyrir nokkrum dögum um afmælisgjöfina hans Magga, en hún vistaðist ekki!! Þannig að í stuttu máli, svona af því ég sagðist ætla að segja ykkur af henni, þá fékk hann miða á tónleika með Neil Young og sveif um á bleiku skýi í nokkra daga, með aulabros á fésinu, svona eins og nýbakaður pabbi Glottandi Þetta átti sér allt smá sögu, sorgarsögu eiginlega, sem endaði svona líka vel. En það kostaði líka blóð, svita og tár (almost) að komast yfir miða. Segi ykkur kannski betur af því seinna.

Ég ætla að taka mér bloggfrí þar til í lok mars. Er komin í mikla tímaþröng með ritgerðina mína og ætla að reyna að gera EKKERT annað en hugsa um hana þar til ég á að skila. Sem þýðir að maðurinn minn þarf að sinna öllum heimilisstörfum (sem hann er reyndar duglegri við en ég), elda mat, kaupa inn, aðstoða við heimanám og allt annað sem til fellur. Þannig að það eru spennandi tímar framundan hjá honum Glottandi

Reyndar erum við að fara til London um þarnæstu helgi, en við erum að fara að hitta Sveinu og Ella, vinafólk okkar sem býr í Noregi. Segi ykkur allt um ferðina síðar, og líka frá tónleikunum sem ég er að fara á í sumar. Fæ fiðring í magann við tilhugsunina. Bon Jovi gott fólk, BON JOVI!! Við Maggi förum með Heiðu og breska spúsanum hennar, og munum við gista eina nótt á flottu hóteli. Þetta verður í úthverfi London. Allt um það seinna.

Þangað til næst; hafið það gott, gangið hægt um gleðinnar dyr og ef ég voga mér að skrifa hingað inn fyrir lok mars, eða þið sjáið mér bregða fyrir annars staðar á netinu, þá megið þið sparka fast í mig!!

Kiss kiss

Miss M.

Miss Marvellous
5 athugasemdir

Afmæli

18. febrúar 2008 klukkan 11:44
Kallinn á afmæli í dag og allir í sjokki! Vorum að skoða bæklingana frá elliheimilunum í gærkvöldi. Svo er bara að velja það sem manni líst best á. Fengum líka bæklinga með göngugrindum og svona rafknúnum farartækjum fyrir gamalmenni, sem þau fara gjarnan á í búðir. Man ekki hvað þetta heitir. Verður maður ekki að reyna að búa honum góða ævidaga í ellinni? Ætla að gera vel við hann í kvöld greyið og elda uppáhaldsmatinn hans, lærissneiðar í raspi (gubb), og að sjálfsögðu verður kaka í eftirrétt. Held ég hafi einu sinni eldað þennan vibbamat fyrir hann áður, sennilega á einhverjum afmælisdeginum. Nenni ekki að segja ykkur frá afmælisgjöfinni núna, geri það í næsta bloggi. Get samt sagt ykkur það, að hann hefur ekki glaðst svona mikið yfir neinu síðustu árin. Það voru hans eigin orð, og það sást líka langar leiðir Hlæjandi

Later

Miss M.
Miss Marvellous
9 athugasemdir

Rasismi

14. febrúar 2008 klukkan 09:27
Fyrir tveimur vikum síðan fórum við Maggi yngri í banka, þar sem hann hugðist sækja um bankareikning. Höfðum við úr nokkrum bönkum að velja, en þeim sem varð fyrir valinu höfðum við heyrt gott af. Við töltum inn og sögðumst vilja opna bankareikning. Við fylgdum starfsmanni bankans sem benti okkur á að fá okkur sæti og hún skyldi sýna okkur hvaða möguleikar væru í boði. Tek það fram að við tókum aldrei fram að þetta væri fyrir Magga, þannig að konan hélt að við værum bæði að fara að opna bankareikning og talaði við okkur samkvæmt því.

Við fáum okkur sæti og hún segir okkur að það séu tveir möguleikar sem við höfum. Annar var sá að opna "basic" reikning, einhvers konar grunnur, og þá fær maður kort, ekki venjulegt debetkort, heldur eitthvert kort úr þunnu plasti, sem eingöngu er hægt að nota í hraðbanka en ekki búðum, og að auki eingöngu í hraðbanka frá þessum banka, ef ég skildi þetta rétt. Ekki góður kostur, nema síður sé. Hinn möguleikinn var svokallaður "útlendingareikningur". Með því að opna einn slíkan fær maður venjulegt debetkort og getur notað það í verslunum og hraðbönkum.

Sá galli er hins vegar á gjöf Njarðar, að kostnaður við slíkan reikning er 6 pund á mánuði, sem gera um 800 krónur íslenskar. Ég spurði hvers vegna það væri, og fékk þau svör að það hefði of oft komið fyrir að fólk frá Austur-Evrópu kæmi hingað, opnaði bankareiking og stofnaði til skulda, og skyldi bankann eftir í súpunni þegar það flytti aftur til heimalands síns.

Ég var of hneyksluð til að mæla orð frá vörum. Við sögðumst ætla að sleppa þessu og fórum. Ég hefði viljað segja svo margt, og enn meira eftir á, þegar ég velti þessu nánar fyrir mér. Væri ekki réttast að allir á Íslandi þyrftu að borga ákveðna upphæð á mánuði fyrir að vera með debetreikning, af því það eru svo rosalega margir sem stofna til skulda og borga það svo aldrei aftur?
Af hverju eru allir útlendingar settir undir einn hatt? Ég hefði kannski átt að benda henni pent á að við værum ekki frá Austur-Evrópu, svona fyrir það fyrsta! Og að ég og maðurinn minn værum búin að vera með viðskipti í öðrum banka í eitt og hálft ár, og þar þyrftum við ekki að borga rasistagjöld fyrir að vera með reikninga!

Eftir því sem ég hugsa oftar um þetta, því ákveðnari verð ég í því að senda bréf til bankans og láta í ljósi hneykslan mína á móttökum mögulegra viðskiptavina. Hér eru allir Austur-Evrópubúar (sem og aðrir útlendingar) settir undir einn og sama hattinn, vegna óheiðarleika ákveðinna einstaklinga. Þetta blessaða fólk á sér litla viðreisnarvon hérna, þrátt fyrir að margir komi í þeim tilgangi að setjast hér að, og hefja betra líf. Þið vitið hvernig ástandið er heima, varðandi Austur-Evrópubúa.

Sama er uppi á teningnum hér. Þessu fólki er ekki vært og ég veit ekki hversu margar blaðagreinar ég hef fundið, um "helvítis útlendingana" síðan ég byrjaði á ritgerðinni minni, og komment um að "þetta helvítis hyski" eigi að hypja sig til síns heima. En ljótt er það, þegar ekki aðeins almenningur sýnir á sér þessa rasistahlið, heldur fyrirtæki og jafnvel stjórnvöld líka!!

"Útlendingareikningur" *hnuss*

Miss M.

Against racism!!!
Miss Marvellous
4 athugasemdir

Guten tag!

11. febrúar 2008 klukkan 12:18
Hef ekki haft tíma eða nennu til að blogga að undanförnu, en fann mig knúna til að hlýða henni Svanfríði minni og henda inn einni færslu.
Það var að sjálfsögðu frábært að fá Möggu í heimsókn. Við fórum á indverskan veitingastað og svo franskan kvöldið eftir og svo á pöbb. Pöbbaferðin var frekar mikið frábrugðin því sem maður á að venjast frá Íslandi, en það var engin tónlist spiluð og bara rólegheit. Klukkan tólf var svo öllum hent út. Mér líkar þetta mun betur heldur en hávaðastaðirnir á Íslandi. Það er mjög þægilegt að geta talað við fólkið sem maður er með án þess að öskra upp við eyrað á því. Í hádeginu á sunnudeginum plataði Viktor okkur á uppáhaldsveitingastaðinn sinn, og um kvöldið eldaði ég lasagne að hætti Jamie Oliver.
Við fórum að sjálfsögðu í búðir. Ég keypti mér tvo kjóla og armband og Magga keypti slatta fyrir sig og börnin, og nokkrar jólagjafir. Hún er svo sniðug, alltaf búin með gjafirnar um mitt ár!

Í dag er þriðji dagur í sumri hér, en þessa daga hefur verið 14 stiga hiti og sól. Eins og best verður á kosið um mitt sumar á Íslandi Brosandi Ekki amalegt það.
Strákarnir eru í vikufríi í skólunum núna. Viktor ætlar að fá David vin sinn í heimsókn í vikunni, en hann kom líka í síðustu viku. Kom með okkur eftir skóla og við keyrðum hann heim eftir kvöldmat. Mikil hamingja yfir þessu :)
Magnús ætlar að leita sér að hlutastarfi samhliða skólanum. Vonandi fær hann eitthvað að gera. Það væri nú ekki slæmt ef hann fengi vinnu í Tesco og við gætum mætt reglulega til að hlæja að honum í Tesco múnderingunni. Þetta eru ekki glæsilegustu vinnuföt sem við höfum séð Hlæjandi

Hef ekki tíma til að skrifa meira núna, og hef raunar voða lítið að segja. Ætla að henda inn færslu á morgun eða hinn um rasisma. Lenti nefnilega í furðulegu atviki í banka um daginn.

Ta Ta (kveðja að hætti Stebba mágs. Frekar gay!) Glottandi

Miss M.


Miss Marvellous
5 athugasemdir